BUTUAN CITY- Gi-anunsyo sa gobyerno sa Chad sa amihanang sentral nga Africa ang plano niini nga mobiya sa International Criminal Court (ICC), nga nagdumala sa mga kaso batok sa mga indibidwal nga giakusahan og war crimes ug crimes against humanity.
Ang maong lakang gisundan sa pag-atras usab sa Burkina Faso, Mali, ug Niger gikan sa maong korte. Sumala sa Chad Government, ang desisyon gibase sa ilang pagsusi sa operasyon sa ICC sukad niadtong 2002, diin ilang giingong limitado ang pagka-epektibo ug dili patas ang pagtutok sa mga imbestigasyon, ilabina sa mga nasod sa Africa.
Sumala sa Chad, kadaghanan sa mga imbestigasyon sa ICC nakatutok sa kontinente sa Africa, hinungdan nga ilang gikuwestyon ang patas nga pagdumala sa korte.
Ang pag-atras sa nasod nahitabo usab taliwala sa mga alegasyon sa posibleng papel niini sa kagubot sa silingang Sudan, samtang ang pormal nga pagbiya sa ICC mahimong epektibo lamang usa ka tuig human madawat sa United Nations ang opisyal nga pahibalo.
