BUTUAN CITY – Gibutyag ni P Supt. Deomedes Cuadra, Hepe sa kapulisan sa Surigao City nga duna nay lead silang gipanubayan sa natigayong pagpamusil ngadto sa pamilyang negosyante kangsa mikutlo na sa kinabuhi sa inahan samtang gitambalan pa ang bana niini.
Nahitabo ang pagpamusil kagahapon sa alas 5:00 sa hapon sa atubangan mismo sa usa ka unibersidad sa Barangay Luna sa maong siyudad.
Saysay pa sa hepe, gikan nagdula ug basketball sulod sa unibersidad ang mga biktima nga sila Engr.Paul Pontius Gogo, 48-anyos, asawang si Abegail Yap Gogo, 46-anyos og anak nga lalaking 20-anyos pulos residente sa maong dakbayan.
Sa dihang nakasakay na sila sa ilang sakyanan, kalit nalang nga mi-abot ang mga suspetsadong sakay sa blue-black XRM motorcycle og gipamusil ang mga biktima gamit ang gitoohang .45 nga pistola.
Nakahi-agum ug mga samad pinusilan ang magti-ayon nga daling gidala sa ospital apan paglabay sa halos usa ka orasm, nakutloan sa hinulamang kinabuhi ang asawa samtang hangtud sa pagkakarun, padayong gitambalan ang bana.
Swerte usab nga wala na-igo ang anak niining lalaki. Daling misibat ang wala mailang mga suspetsado Bernadette Village sakop sa maong syudad apan miliko kini pagawas sa dakbayan.
Giklaro ni P Supt. Cuadra nga duna na silay lead sa gihimung pagpanubay apan dili pa kini nila pwedeng ibulgar sa publiko.
Gipalawman pa usab ang ilang imbestigasyon tungod kay sa karun, nagduha-duha pa ang kabanay sa biktima nga maghatag ug pamahayag tungod kay padayon pa nilang giplaster ang mga biktima.
Sa nahiunang impormasyon, nakadawat na og hulga sa kinabuhi ang pamilya gikan sa armadong grupo tungod sa matud pa away sa yuta.
