BUTUAN CITY – Pormal nang gitak-upan ang Palarong Pambansa 2026 sa pagpanguna ni Department of Education kon DepEd Secretary Juan Edgardo ‘Sonny’ Angara uban sa mga tag-as nga opisyal sa probinsyal nga panggamhanan sa Agusan del Sur pagpanguna nila Governor Santiago Cane Jr, Vice Governor Patricia Anne Plaza ug nila Congressmen Alfelito “Alfie” Bascug ug Eddiebong Plaza.
Gisugdan kini sa athlete assembly pasado alas-dos sa hapon dayon sa unity parade paglabay sa 30-minutos dayon ang cultural program, awarding, ug finale performances.
Wala usab mawala ang traditional rites nga mao ang pagpa-ubos sa bandila sa Pilipinas apil na sa Department of Education kon DepEd ug sa Palarong Pambansa ug ang pagpalong na sa Unity Cauldron.
Gipasidunggan ang mga teams nga duna’y tag-as nga performances kon kadtong nasulod sa Top 5 regions nga nanguna sa medal tally.
Gideklarang overall champion sulod na sa 19 ka mga tuig ang National Capital Region kon NCR human nanguna sa final and official overall medal tally. Gisundan sila sa Region IV-A kon CALABARZON o Cavite, Laguna, Batangas, Rizal ug Quezon.
Ikatulo ang Region XI kon Davao Region nga gisundan sa Region VII kon Central Visayas dayon ang Region VI kon Western Visayas ug ika-unom ang host province.
Hingpit na usab nga na-turn over ang hosting sa sunod nga palaro ngadto sa Quezon City kansa gidawat ni Mayor Maria Josefina ‘Joy’ Tanya Belmonte.
Nahimong finale ang grand unity dance nga duna’y titulong “We Rise As One: The Ultimate Palaro Dream” kansa nag-feature sa mga local artistsmga opisyal ug mga delegates.
