BUTUAN CITY – Gidili na ang pagtawag og lumad sa bisan unsa nga tribu kondili, kinahanglang tawagon sila base sa tribu diin sila nahisakop.
Kini ang unod sa National Commission on Indigenous People kon NCIP Commission Resolution En Banc kansa sigon ni kanhi NCIP Caraga Regional Director ug karon mao na ang NCIP-Region 4 A director Ferdausi Cerna, na-uyunan sa en banc nga gilangkubnan sa pito ka mga commissioners gikan sa nagkada-iyang rehiyon sa nasud.
Sa eksklusibong pakighinabi sa Bombo Radyo Butuan, gipadayag ni Atty. Cerna nga base sa pagtuon, ang pulong nga lumad maoy gigamit sa mga walhong grupo.
Tumong lang sa resolusyon nga dili mahatagan og sayop nga impresyon, impormasyon ug interpretasyon ang publiko sa pulong nga ‘lumad’.
Gipasabot pa ni Cerna nga ang pulong nga lumad, gigamit sa mga tawong natawo ug nagpuyo sa usa ka lugar kansa wala nagpasabot nga membro na sa indigenous people kon tribu.
Gani kini matud pa ang hinungdan nga sa matag-intervew kaniya, dili siya mugamit sa pulong nga lumad tungod kay i-address gyod niya kini sa tribu diin siya naggikan base sa iyang dugo ug kaliwatan.
