BUTUAN CITY- Gipasiugda ni LTC. Joe Patrick Martinez, Public Information Officer sa 4th Infantry Division, Philippine Army, nga malampuson ang nahimong deklarasyon niadtong Hunyo 18 isip Stable Internal Peace and Security o wala nay aktibong presensya sa New People’s Army kon NPA sa Caraga Region.
Sumala pa ni Martinez, nga kini usa ka resulta sa panaghiusa sa lokal nga mga lider, mga ahensya sa gobyerno, ug sa suporta sa komunidad. Gibutyag usab niini, nga 15 ka tuig ang milabay, ang Caraga ug ang sakop sa 4th Infantry Division maoy adunay pinakadaghang pwersa sa NPA sa tibuok nasod, apan karon mikunhod na kini ngadto sa zero sa Caraga, samtang 16 na lang usab ka mga miyembro sa Region 10 ang ilang ginasubay.
Sigon ni Martinez, ang maong kalampusan usa ka natuman nga damgo dili lamang alang sa 4th Infantry Division kondili alang usab sa tibuok Caraga Region.
