BUTUAN CITY – Gipahayag ni Israeli Prime Minister Benjamin Netanyahu nga prayoridad karun sa Israel ang pagbungkag sa impluwensya sa Hezbollah sa Lebanon, dungan sa nagpadayon nga tensyon sa Middle East.
Taliwala sa padayon nga tensyon sa rehiyon, gibutyag ni Netanyahu nga nakatutuk ang Israeli forces sa Bint Jbeil, nga gitawag niyang nag-unang kuta sa Hezbollah sa southern Lebanon.
Ang tensiyon tali sa Israel ug Hezbollah nga iladong gisuportahan sa Iran subling midako human ang military operations sa U.S.-Israeli strikes batuk sa Iran niadtong Pebrero 28, nga matud pa nagpaulbo sa mas lapad nga giyera sa Middle East.
Dungan niini, gibutyag usab ni Netanyahu nga padayon ang koordinasyon sa Israel ug Estados Unidos sa hisgutanang Iran, lakip na ang pagpahawa sa enriched nuclear material ug paghatag sa limitasyon sa nuclear capabilities sa nasud.
Dugang pa niini nga dili pa segurado ang mahimong dagan sa sitwasyon apan andam ang Israel sa bisan unsang posibleng senaryo ugaling subling moulbo ang mas lapad nga giyera sa rehiyon.
