BUTUAN CITY – Gipasabot ni Philippine Economic Zone Authority (PEZA) Director General Charito ‘Ching’ Plaza ang mga rason kung nganung gi-veto ni Pangulong Ferdinand Marcos Jr ang Bulacan Airport City Special Economic Zone and Freeport Authority ilalom sa House Bill No. 7575.
Sumala ni Plaza, dunay duha ka paagi sa paghimo og economic zone, ang usa pinaagi sa lehislasyon ug ang usa, ang deretsong pagparehistro sa PEZA.
Daghang mga legislated economic zones matud pa ang na-aprubahan apil ang mga gipanag-iyahan sa gobyerno sukwahi sa Bulacan Airport City Special Economic Zone and Freeport Authority nga usa ka pribado.
Sigon ni Plaza, dili kini pwedeng himoong balaod tungod kay mapugos na unya ang gobyerno sa paghatag og budget niini.
Samtang duna pay probisyon sa sugyot nga dili matud pa sila subject sa COA rule butang nga dakong supak sa batakang balaod.
Pagbutyag pa sa opisyal nga nakita na kini sa 18th Congress apan blangko kini kung unsay rason nganung gipadayon ang balaodnon.
Alayon niini, girekomenda ni Plaza ngadto kang Pangulong Marcos ang win-win solution isip pamaagi aron mahinayon ang maong plano.
Kini pinaagi sa pag-donar sa parte sa Bulacan airport ngadto sa gobyerno aron ma-justify na ang paghatag og pondo niini.
