BUTUAN CITY- Ming-apela si Senator-Judge Robin Padilla sa House prosecution panel nga magpabiling patas ug dili “one-sided” sa impeachment trial ni Vice President Sara Duterte, ilabina sa pagpili ug pagpresentar sa mga testigo. Gisukit ni Padilla ang kredibilidad sa pipila ka testigo, lakip ang kanhi giingong miyembro sa Davao Death Squad (DDS) nga si Arturo Lascañas, tungod sa giingong nagkalainlaing pahayag niini, ingon man ang duha ka opisyal sa National Bureau of Investigation (NBI) nga iyang giingong adunay mga alegasyon sa perjury.
Apan gipatin-aw sa House lead prosecutor nga si Gerville Luistro nga walay nakabinbing kaso batok sa ilang mga testigo ug nga ang ilang presentasyon gibase sa balaod ug sa mga ebidensya nga may kalabotan sa giingong hulga ni VP Sara batok kang Pangulong Ferdinand Marcos Jr.
Tungod niini gi-insistar pag-usab ni Padilla ang iyang pamahayag nga dili himuong “one-sided” ang proseso. Aduna usab reaksyon sa mga tao sulod sa bulwagan hinungdan nga mipahimangno usab si Escudero nga ipabilin ang kahapsay.
Sa wala magdugay, giklaro ni Padilla nga ang iyang pamahayag wala magtumbok sa pagpabor sa unsa mang kamp kundi sa pagpanginahanglan sa patas nga pagtan-aw sa tibuok proseso sa impeachment.
Giklaro usab niini nga ang iyang punto adunay kalabotan sa hisgutanang paglakip sa pipila ka senador sa pagtaral ug sa mga nahimongpamahayag kalabot sa posibleng wala paglakip sa ilaha nga makaboto sa impeachment court.
Kahinumdumang tulo ka senador ang ‘wala sa kasamtangang impeachment trial lakip sila Senator Ronald “Bato” Dela Rosa nga hangtud karun wala pa magpakita sukad niadtong minghawa kini sa kustodiya sa Senado, Senator Jinggoy Estrada kinsa nag-atubang og kasong plunder kalabot sa flood control scandal, ug si Senator Rodante Marcoleta kinsa nag-atubang usab sa kasong plunder nga parehong naka-dintinee sa Quezon City Jail.
