BUTUAN CITY- Personal nga gitunol ni President Ferdinand Marcos Jr. ang P100 milyon nga ayuda pinansiyal kang General Santos City Mayor Lorelie Pacquiao atol sa iyang pagbisita sa Mindanao aron personal nga masusi ang kahimtang sa mga lugar nga grabeng naapektuhan sa kusog nga linog.
Ang maong pondo, nga gikan sa Local Government Support Fund (LGSF), gamiton alang sa rehabilitasyon ug pagpaayo sa nadaot nga City Hall sa General Santos City. Gipasalig usab sa Presidente nga ang matag pamilya nga namatyan tungod sa kalamidad makadawat og P50,000 nga pinansiyal gikan sa gobyerno. Sumala sa pinakabag-ong datos sa National Disaster Risk Reduction and Management Council, miabot na sa 45 ka mga indibidwal ang kumpirmadong namatay tungod sa linog. Gisaad usab ni Marcos ang dugang nga pinansiyal alang sa mga lokal nga kagamhanan sa Sarangani ug South Cotabato aron matabangan ang pag-ayo sa mga naguba nga imprastraktura, bisan wala pa matino ang eksaktong kantidad sa pondo nga ihatag.
Atol sa iyang inspeksiyon sa apektadong mga lugar, gimando sa Pangulo sa tanang adunay kalabutan nga ahensiya sa gobyerno nga pa-paspasan ang paghatod sa ayuda ug ang rehabilitasyon sa mga imprastraktura aron dali nga makabangon ang mga komunidad. Gipasalig usab niini nga aktibong motabang ang National Housing Authority sa mga magtutudlo ug residente nga nadaotan ang ilang mga panimalay. Gawas sa relief goods, pagkaon ug medikal nga serbisyo, nag-andam usab ang gobyerno og pinansiyal nga tabang alang sa mga trabahanteng naapektuhan sa temporaryong pagsira sa mga establisimyento pinaagi sa mga programa nga Assistance to Individuals in Crisis Situations (AICS) sa DSWD ug Tulong Panghanapbuhay sa Ating Disadvantaged/Displaced Workers (TUPAD) sa DOLE.
Samtang nagpadayon ang recovery efforts, gipadali usab sa mga awtoridad ang pagsusi sa mga nadaot nga building, pag-abli sa mga baradong karsada, ug pagpasig-uli sa suplay sa kuryente ug tubig aron mas episyente ang paghatod sa serbisyo ug ayuda ngadto sa mga biktima. Naglaum usab si Pangulong Marcos Jr. nga mohunong na ang mga aftershock aron walay sagabal ang padayong rehabilitasyon ug pagbangon sa mga apektadong lugar.
