BUTUAN CITY – Giproblema karon ni Kapitan Desiderio Cuenca sa Brgy. Pinamanculan ning siyudad sa Butuan, ang pagkahanaw sa 1.8-milyunes pesos nga pundo internal revenue allotment kon IRA sa ilang barangay kansa niadto pang Mayo 26 nadiskubrehan sa ilang barangay treasurer human nagdeposito og 900-mil pesos.
Sa eksklusibong pakighinabi sa Bombo Radyo Butuan, gipadayag ni Kapitan Cuenca nga dali gilayon siyang nakigtagbo sa ilang mga barangay kagawad aron mapahibalo kini kanila nga tibo nga gi-withdraw ang tseke niadtong Mayo 18 sa ingon ilang ma-aksyunan.
Dinhi na dayon siya nagpatabang sa National Bureau of Investigation kon NBI aron lang ilang makuha og balik ang kwarta nga gi-withdraw matud pa sa tawong padayon pa nila karong gipanubayan.
Hangtud nga mi-abot na siya sa Development Bank of the Philippines diin nasubay nga didto gi-withdraw ang tseke ug migawas pa nga nabalhin na usab kini ngadto sa Land Bank of the Philippines.
Ang iyang gikaproblemahan karon tungod kay bisan naghatag na siya og barangay resolution aron makakuha og kopya sa tseke sa ingon makita ang mga signatories niini, nagdumili ang Land Bank sa rasong nagsunod sila sa Bank Secrecy Law rason nga court order lang ang bugtong dalan aron mahatagan sila og kopya niini.
Gitu-uhan ni Kapitan Desiderio Cuenca nga inside job ang nahitabong pag-withdraw sa ilang kwarta.
Kini human niya napanubayan og maayo dihang nag-request na og CCTV footage si Kapitan Desiderio Cuenca ngadto sa kadumalahan sa DBP rason nga nakita nilang duna’y pipila ka mga tawong nagkunsabo aron ma-withdraw ang kwarta.
Gibasol matud pa niya ang BDP sa pag-release sa maong kwarta taliwa nga wala una sila gikunsulta kalabot niini ilabina nga sukad masukad, wala sila maka-withdraw og ingon niini kadako nga kantidad.
Ang iyang gikatingala tungod kay wala’y bisan usa sa iyang mga constituents nga nakita sa CCTV footage gawas niadtong taga-Ranch Enterprise, kansang tag-iya mi-angkon kaniyang duna’y nag-purchase kanila og mga appliances ha-um sa maong kantidad.
