BUTUAN CITY – Gitangtang na ni Atty. Alim Pangandaman, regional director sa Land Transportation Office kon LTO-Caraga nga nakabase ning siyudad sa Butuan, ang gwardiya nga unang gidu-ulan sa usa ka Amerikanong magpa-convert unta sa iyang American driver’s license aron iyang magamit apan gipangilkilan na hinuon matud pa siya.
Una nang gipadayag sa Amerikanong si alyas Cris sa eksklusibong pakighinabi sa Bombo Radyo Butuan, nga katulo siya midalikyat sa maong buhatan aron ilisdan og Philippine version ang iyang driver’s license apan pulos siya gibungatan og kwarta.
Ang pagkataktak sa maong gwardiya mao ang aksyon sa director human mi-ani og mga negatibong komento ug mga pagkondena ang nasangpit nga hitabo nga unang gi-post ni alyas Cris sa social media.
Gihimo matud pa kini sa opisyal human sa iyang gihimong kina-ugalingong imbestigasyon kondiin iyang nasuta ang kamatu-uran sa maong reklamo.
Ang gwardiya lang matud pa ang iyang gitaktak sa serbisyo tugod kay wala man matumbok sa Amerikano kung kinsa ang gika-ingon niyang ilang empleyado nga nalambigit sa pagpangilkil kanya.
Tungod niini, iyang gi-awhag ang reklamante nga magduso og formal complaint aron duna sila’y legal nga basehan sa ipatuman unya niyang aksyon.
Gawas sa gika-ingong ilang mga empleyado nga nalambigit sa maong modus kansa andam matud pa niyang pahamtangan og silot, guhulat pa nila ang saad sa reklamante nga personal nga muduol sa ilang buhatan aron matudlo usab ang medical clinic nga nangayo kaniya og P9,500.00 alang lang sa gipangayo niyang medical certificate.
Kung makumpirma ang maong alegasyon, iya matud pang irekomenda ang pagsuspende sa opeerasyon niini.
