BUTUAN CITY – Gi-andam na sa kapulisan ning siyudad ang ipasakang mga kasong arson ug robbery batuk sa mga rebeldeng New People’s Army kon NPA nga misunog sa duha ka mga trak nga gipanag-iyahan sa Primevibe Corporation ning mi-aging gabii sa may Purok 4, Brgy. Sumilijon ning siyudad sa Butuan.
Sa eksklusibong pakighinabi sa Bombo Radyo Butuan, gipadayag ni Butuan City Police Director PLCol Rommel Villamor nga duna na sila’y natumbok nga mga indibidwal nga mihimo niini ug ila nang giplastar ang ang mga dokumento ug ebidensyang gamiton sa pagpasaka og reklamo ngadto sa piskaliya ilabina nga duna’y personahe sa Bureau of Jail, Management and Penology kon BJMP kinsa bana sa usa sa mga staff nga gikuhaan sa mga rebelde sa iyang personal nga mga gamit.
Base sa ilang imbestigasyon, ang wala matud pa paghatag og revolutionary tax ang hinungdan nga gi-atake sa mga rebelde ang compound kondiin nakuha nila ang kalibre .38 nga revolver sa gwardiya.
Aminado ang opisyal nga dili gilayon ma-aksyunan sa kapulisan ang ingon niini nga panghitabo kung dili gilayon mapa-abot ngadto kanila.
Alayon niini mihangyo kini og kooperasyon sa katawhan nga isumbong gilayon sa pinakaduol nga police station higayong duna’y matigayon nga ingon niini nga binuhatan sa walhong grupo aron ila gilayong ma-aksyunan.
