BUTUAN CITY – Nasuta sa review sa 22 ka mga pagtuon nga wala’y klarong ebidensya nga ang natural nga trans fats nga makita sa dairy products sama sa gatas, keso, butter, ug yogurt makadugang sa risgo sa sakit sa kasing-kasing, stroke ug kamatayon tungod sa cardiovascular disease, o type 2 diabetes.
Lahi kini sa industrial trans fats, nga gihimo sa pabrika pinaagi sa proseso sa food manufacturing.
Ang industrial trans fats dugay nang nailhan nga makadaot ug nalambigit sa taas nga risgo sa sakit sa kasing-kasing ug diabetes.
Ang natural nga trans fats makita sa mga produkto gikan sa mga hayop sama sa baka, karnero, ug kanding, pero sa gamay ra nga kantidad ug ang mga tigduki-duki dugay nang nagdebate kung pareho ba ang epekto niini sa industrial trans fats.
Sa bag-ong analysis, wala nakit-an ang klarong koneksyon tali sa dairy-based trans fats ug pagtaas sa risgo sa sakit sa kasing-kasing, stroke, o diabetes.
Sa kinatibuk-an, nagpakita ang resulta nga importante ang pag-ila sa kalainan sa natural nga trans fats ug industrial trans fats, kay dili sila pareho og epekto sa panglawas.
