BUTUAN CITY – Mukabat sa 50-mil pesos ang kinatibuk-ang damyos sa nasunog nga upat ka mga lawak-tunghaan sa Ong Yu Elementary School ning siyudad sa Butuan kagahapon.
Sigon ni SFO4 Rodrigo Canton, City Fire marshall sa Bureau of Fire Protection kon BFP-Butuan, electrical short circuit ang nakita nilang hinungdan sa pag-ulbo sa kalayu diin milamoy sa duha ka mga H.E. rooms, Canteen ug Clinic sa Ong Yu Elementary School.
Nadawat ang fire call alas 2:28 kagahapon sa hapon nga dali usab nilang gi-respondihan dala ang 2 ka firetruck nga gi-abagan sa laing usa pa gikan sa pribadong sektor ug nadeklarang fire out alas 2:50 sa hapon.
Nasayrang karaan na ang maong dakbalay nga gi-renovate sa nakalabay’ng tuig ug dunay namatikdang mag-spark niini ilabina sa panahon sa ting-ulan.
Alayon niini, nagpahimangno nalang ang City Fire marshall sa tanang Butuanon nga likayan ang mga buluhatong maoy posibling tinubdan sa sunog sama nalang sa paghaling-haling nga mamahimong mosangpot sa grassfire. (Rolan Janea)
