BUTUAN CITY – Nadugta ug gi-ulod nang napalgan sulod sa iyang panimalay ang 47-anyos nga mag-uuma nga si Ananias Tado Abad sa may Sitio Palilihan, Mahanub, Gigaquit, Surigao del Norte.
Sumala ni PLT. Dary Paul Apurada, officer-in-charge sa Gigaquit Municipal Police Station, nasayran na lamang ang maong panghitabo dihang gisusi sa mga silingan ang perti kabaho na nga balay niini, ug didto nakita ang decomposing stage na nga patayng lawas ni Abad.
Kahibaloang nag-inusara lamang ang maong biktima sa iyang balay, ug saysay sa opisyal nga wala silay nakitang foul play sa maong panghitabo.
Gi-asuy matud pa sa mga kabanay sa biktima nga dugay na nilang gihangyo ang maong lalaki nga mopuyo uban kanila, apan nagdumili kini.
Nasayran pa sa kapulisan nga dunay history ang nasnagpit nga biktima sa operasyon sa ulo tungod pagkadisgrasya niini sa motorisklo apan padayon pa gihapong gipanubayan sa kapulisan kung unsa ang hinungdan sa kamatayon maong mag-uuma.
