BUTUAN CITY – Gi-aprubahan sa Sangguniang Panlalawigan sa Cotabato ang Resolution No. 2026-410, nga naghangyu sa Palarong Pambansa Board nga ipangalan sa namatay nga si Rene Clert “Bobet” Baterbonia ang Most Valuable Player kon MVP Award sa dulang basketball sa maong torneyo.
Ang resolusyon gisang-at ni Sangguniang Kabataan kon SK Provincial Federation President ug Ex-Officio Board Member Karen Michie De Guzman isip pag-ila sa dakong natampo, dedikasyon, ug inspirasyong gibilin ni Baterbonia sa natad sa basketball ug sa kabataang Pilipino.
Gipirmahan ni Vice Governor Rochella Marie Taliño Taray ang tulo ka palid nga resolusyon nga nagtinguhang pasidunggan ang kinabuhi ug legasiya ni Baterbonia, nga naningkamot aron makab-ot ang iyang pangandoy nga mahimong propesyonal nga basketbolista aron mahatagan og mas maayong kinabuhi ang iyang pamilya.
Naglaum usab sila Governor Emmylou “Lala” Taliño-Mendoza ug ang mga miyembro sa Sangguniang Panlalawigan nga mahatagan og pag-ila ang gibilin sa taga-Talacogon, Agusan del Sur, nga nagsilbing inspirasyon sa daghang kabataan nga padayon nga mangandoy ug maningkamot bisan paman sa mga pagsulay sa kinabuhi.
