BUTUAN CITY – Gidugok na og ubay-ubay nga mga kliyente sukad pa kagabii ang buhatan sa Social Security System kon SSS-Butuan aron lang maka-una sa linya alang sa ilang gihimong transaksyon ning adlawa.
Ang uban pasado pa sa alas-otso pa kagabii nangabot rason nga nanggidala na lang og higdaanan nga giplastar kilid sa maong buhatan.
Duna usa’y uban nga didto natulog sa Guingona Park ug midalikyat na sa maong buhatan kaganinang ala-una sa kaadlawon sama kang Nany Nene nga taga-Brgy. 1, Buenavista, Agusan del Norte. Iyang gibutyag nga duha ka higayon na niya kining gihimo kansa sukwahi kaniadtong wala pa ang pandemya.
Samtang alas-11:45 pa kagabii ang taga-Sibagat, Agusan del Sur nga si Roy Dupalco kinsa mipakyaw pa og motorsiklo aron kang maka-abot sa maong buhatan kansa wala niya gimahayan tungod kay siya man ang naka-una sa linya aron mahikay niya ang mga papeles sa iyang SSS retirement.
Samtang dismayado usab ang taga-Brgy. Taglibas, Bayugan City nga si Analiza Antojadol tungod sa kapila na niya og balik-balik aron lang ma-process ang burial claim sa iyang kabanay.
Sa iyang pagsaysay, gibutyag niining pila ka teller na ang iyang nadu-ulan kansa lahi-lahi og gipangayong requirements hinungdan sa pila ka higayon na niyang pagbalik sa SSS.
Dismayado ang ginang tungod kay bisan og mag-motor sila, mugasto gihapon sila sa lahi-lahing nga requirements ug ang ilang ma-claim nga burial benefit, mu-abot lang sa 20-mil pesos. Kini ilabina nga nananto lang sila og kwarta aron mahikay ang gikinahanglang papeles.
