Mga residente sa usa ka barangay sa Agusan del Norte, nanghiklilng tungod matud pa sa pagpang-harass sa militar

BUTUAN CITY – Nagpasilong sa covered court sa Brgy. Upper Olave sakop sa lungsod sa Buenavista, Agusan Del Norte ang 38 ka pamilya nga residente sa Purok-11 sitio Bulak, Lower Olave human matud pa sa gihimung pagpang-harass sa kasundaluhan.
Emosyunal nga misumbong ning sibyahan ang usa sa mga bakwit nga si Charmaine Salas tungod sa maong hitabo.
Sumala pa niini, ning niaging adlaw pa miabot sa ilang lugar ang dul-an usa ka gatus ka mga sundalo nga miyembro sa 23rd Infantry Battalion, Philippine Army samtang kagahapong adlawa gihimu sa mga sundalo ang pag-harass sa mga sibilyan kinsa gi-alegahan pang mga miyembro sa NPA. Gisulod pa niini ang mga balay ug gipang-plantera ug mga bala.
Samtang ubay-ubay usab ang ilang gihawirang mga sibilyan lakip na ang Purok Chairman nga si Sario Mandahinog.
Saysay pa niini nga dunay ilang mga silingan pa nga gipahawid og armas og bomba unya gikuhaan ug mga hulagway hinungdan sa dali nilang pagbiya sa ilang lugar.
Gusto lang nila karun nga ma-rescue ang ilang mga kaubanan.
Samtang sa pakighinabi usab sa kang Capt. Al Anthony Pueblas, CMO Officer sa 402nd Brigade Philippine Army, giklaro niining wala siya’y nadawat nga balita kalabot sa dili maayong binuhatan sa militar taliwa nga gipa-abot kini mismo ning sibyahan.
Pamugos pa niini nga dakong bakak ang nadawat nga impormasyon ning sibyahan.
Bisan paman niini, gipadayag ni Pueblas nga kung duna siya’y madawat nga report mahitungod niini, maghimu gelayon sila ug imbestigasyon og disiplinahon ang kasundaluhang tinuod nga mihimo niini. (Melody Valledor)