BUTUAN CITY – Mihakot og 36 ka mga medalya ang mga weightlifters sa Pilipinas sa bag-uhay lang nahuman nga 2026 East/Southeast Asia Subregional Championships nga gipahigayon sa Hainan, China.
Gawas pa niini, nakadawat usab sila og tulo ka espesyal nga pasidungog ug duha ka national records.
Sumala sa Powerlifting Association of the Philippines (PAP), ang medalya naglangkob sa 22 ka gold, 10 ka silver, ug 4 ka bronze.
Ang mga nakadaug sa medalya mao sila Adrian Perillo, James de Luna, Juan Teodoro Zabala, Jose Virgil Perez, Ryant Relos, Emilion Florendo, Audrick Khong Hun, John Sorima, Rayven Villasotes, Anya Pinzon, Jomara Chan, ug Clara Buenconsejo.
Nakabutang og bag-ong national ug individual lift records sila Relos, Chan, ug Pinzon.
Samtang ang Philippine team nakadaug sa Best Team honors sa Men’s Open ug Men’s Masters I divisions. Si Perez gideklarar nga Best Lifter, samtang si Zabala—nga unang nakasalmot sa international tournament—nakab-ot ang ikatulong puwesto sa Best Lifter rankings.
