BOMBO BUTUAN – Gikumpirma ni Manuel Ayap, ang Foreign Service Officer ug Vice Consul sa Philippine Consulate General sa Manado, Indonesia nga wala’y angayang kabalak-an ang mga Pinoy dinhi sa Pilipinas sa seguridad sa atong mga kabanay nga atua sa Indonesia human ang suicide bombing sa gawas nga bahin sa simbahang Katoliko sa Makassar City niadtong Dominggo.
Sa eksklusibong interview sa Bombo Radyo Butuan, gipadayag ni Vice Consul Ayap nga taliwa sa maong panghitabo, normal lang ang inadlaw-adlaw nga kasikas sa mga tawo ilabina sa palibot sa lugar nga nahitabuan.
Duna na usab matud pa’y gigukod nga mga tawo ang kapulisan human gimando ni President Joko Widodo nga patubagon sa balaud ang mga nagpaluyo niini nga gikonsidera niining terrorist act.
Wala matud pa kini epekto sa mga Muslim ug Kristiyanos sa maong nasud tungod sa maayong relasyon sa duha ka hut-ong kansa dili matud pa basta-basta maguba sa religious belief sa mga tawo.
Human sa insidente, dali nilang gitawagan ang gamay nga komunidad sa mga Pinoy nga atua sa Makassar City nga gilangkuban sa mga magtutudlo ug nasuta nga wala’y bisan usa kanila ang nadamay.
Samtang sa mga kaso sa COVD-19, padayon usab ang pagsaka sa ihap sa mga nataptan niini apan padayon usab ang vaccination rollout sa gobyerno.
Gani sa Manado, ang sunod na sa mga healthcare frontliners ang gibakunahan aron mahimo lang normal ang dagan sa panginabuhian.
Sa karun wala pa nagkatunga sa tibook populasyon sa Indonesia ang nakadawat sa bakuna tungod kay limitado lang ang suplay niini.
