BUTUAN CITY- Nagpadayon ang pagbangon sa pipila ka lugar sa Japan human sa kusog nga Magnitude 7.1 nga linog nga miigo sa nasud kagahapon, diin daghang imprastraktura ang nadaot ug naputol ang suplay sa tubig ug kuryente sa ubang komunidad. Sumala ni Rosalinda Gallardo, Bombo International Correspondent to Japan, nga ang ilang mga kauban nga nagpuyo sa Hikawa, lugar kung asa labing grabe ang epekto sa linog, temporaryong mibalhin sa ilang workplace tungod sa kakulang sa batakang serbisyo.
Gibutyag usab niini nga sa wala pa ang maong panghitabo didto pa kini sa usa ka mall nga gitahong nahugno. Bisan pa sa dakong kadaot sa Hikawa, limitado lamang ang epekto sa Kashima ug sa ilang workplace, diin nagpadayon gihapon ang operasyon sa mga kompanya sa mga lugar nga wala kaayoy kadaot.
Sigon ni Gallardo, dako ang ilang pagpasalamat nga luwas sila ug adunay padayon nga trabaho bisan pa sa hagit nga gidala sa maong kalamidad.
Dugang pa ni Gallardo, nga base sa ilang nakalap nga impormasyon misaka na sa 13 ang kumpirmadong namatay tungod sa Magnitude 7.1 nga linog sa Japan, samtang upat pa ka tawo ang padayon nga gipangita sa naguhong mall.
Gani walay Pilipino nga nalakip sa mga biktima, ug nagpadayon ang pagmonitor sa kahimtang sa mga OFW sa maong lugar. Matod niini, kanunay silang naghatag og update sa ilang mga pamilya sa Pilipinas aron mapahibalo nga luwas sila ug dili mabalaka.
