BUTUAN CITY – Tungod sa nagkataas nga mga kaso sa COVID-19 dinhi sa dakbayan sa Butuan hinungdan nga gipa-ilalom kini sa alert level 3 sa Inter-Agency Task Force, gikansela na sa Sto. Niño Shrine ug sa konseho sa Brgy. Libertad ang mga kalihukan sa Kahimunan alang sa kapistahan sa ilang patron nga si Sr. Sto. Niño.
Sa eksklusibong pakighinabi sa Bombo Radyo Butuan, gipadayag ni Libertad Brgy. Captain Menchie Rosario nga apil sa gikansela ang ilang motorkada nga gitakda unta kagahapon sa buntag sa tumong nga malikayang mahimo kining super-spreader event.
Ang wala gikansela mao lamang ang pagpahigayon og kada-oras nga misa apan limitado na ngadto sa 30-porsiento nga capacity.
Tungod niini, gikan sa 700 ka gi-andam nilang mga lingkuranan, mu-abot na lang sa 280 ang tugutang personal nga makatambong sa matag-misa.
Samtang tungod sa nagkadaghan na nga mga kaso sa COVID-19 sa ilang barangay, bawal una ang panagtapok sulod sa pinuy-anan ilabina sa mismong adlaw sa Kapistahan ugmang adlawa Dominggo gawas lang kung pulos mga membro sa pamilya ang anaa sulod sa panimalay kansa nagpasabot nga wala una nila gitugutan ang pagpamista.
Samtang alang sa posibleng pagpatuman og granular lockdown sa ilang barangay, giklaro ni Kapitan Rosario nga mag-agad pa gihapon kini mando sa Incident Management Team ning siyudad.
