BUTUAN CITY – Gibansay sa Department of Agriculture–Bureau of Fisheries and Aquatic Resources (DA-BFAR) Caraga kalabot sa pagproseso sa bangus ang mga regional Gender and Development (GAD) advocates isip kabahin sa programa sa pagpalig-on sa panginabuhian sa kababayen-an.
Gipahigayon ang hands-on training sa Regional Fisherfolk Training Center sa Butuan City, nga gitambungan sa mga representante gikan sa nagkalain-laing ahensya sa gobyerno.
Gihisgutan sa maong pagbansay ang hustong pagdumala sa isda, pagsunod sa mga sumbanan sa kalimpyo, ug lain-laing pamaagi sa pagproseso sa bangus aron makahimo og mga produktong mas taas ang kantidad sa merkado.
Tumong sa programa nga mapalapdan ang mga oportunidad sa panginabuhian sa kababayen-an ug mapalig-on ang ilang papel sa industriya sa pangisdaan.
Gilauman usab nga mas mapalig-on pa ang panagtinabangay sa DA-BFAR Caraga ug sa ilang mga kaabag nga ahensya aron mapa-uswag ang inklusibong kalamboan sa mga komunidad.
