BUTUAN CITY – Gihimangnoan ni Ruel Hipolan, Executive director sa Save Mindanao ang tanang residente ning siyudad sa Butuan ang anaa sa daplin sa Agusan River nga magbinantayon tungod kay matag karun ug unya, motaas ang lebel sa tubig.
Kini human nakumpirma ni Hipolan atol sa ilang gipahigayon nga emergency reponse mission kauban ang mga Non Government Organization ug mga volunteers, ang kadako na sa Agusan marsh didto sa Agusan Del Sur nga modagayday sa Butuan City.
Paghulagway pa ni Hipolan atol sa eksklusibong pakighinabi ning sibyahan, daw pacific ocean na ang agusan marsh diin bisan ang kadtong mga tag-as nga kahoy, tumoy nalang ang makita.
Kagabii, nagsugod na matud pa pag-awas ang tubig ug padulong na kini dinhe sa siyudad hinungdang kinahanglan nga dili mag-kumpiyansa ang mga lumulopyo sa kilid sa Agusan River.
Mas maayu matud pa nga mobakwit na aron malikay sa peligro ug dili na magparescue pa.
Karung adlawa ipadayun sa team ni Hipolan ang pagsuhid sa mga dapit nga na-igo sa flash flood niadtong Enero 16 ning tuig ilabina kadtong mga hilit nga dapit.
Sama nalang didto sa Barangay Los Angeles, lungsod sa La Paz, Agusan Del Sur, diin mihangyu ang kadagkoang opisyal sa tribal nga sila pagabisitahon aron makita ang damyos nga hatud sa mga pagbaha.
Samtang sa pakighinabi usab sa residenteng si Julita Huwersa, sa Sitio Kilobidan sakop sa lungsod sa Bunawan, gibutyag niini nga nahadlok na sila sa grabe ka taas sa tubig sa Agusan Marsh.
Lakip sa ilang gikabalak-an ang pagkusog sa huyop sa hangin nga posibling makapalid ug makatumba sa mga nagluntaw nilang kabalayan. Kini tungod kay wala na silay kahoy pa nga kahiktan sa ilang panimalay ug wala na usay kapasalipdan.
Gawas pa kini sa lisud nga pagpangisda nga maoy ilang panginabuhi.
