BUTUAN CITY – Bongga nga heroes welcome ang misugat nga mga atleta sa lungsod sa Loreto, Agusan del Sur ilabina kadtong mihakot og mga bulawan gikan sa Palarong Pambansa 2026, tungod sa cash incentives nga gihatag kanila ni Mayor Alvin Otaza isip pagpasidungog sa ilang kaisog, paningkamot, ug mga kadaugan nga nagdala og dungog sa Loreto ug sa Caraga Region.
Isip pasalamat sa ilang kahago, ang matag-gold medalist nakadawat og ₱100,000, samtang ₱30,000 ang silver medalist ₱20,000 ang bronze medalist.
Lakip usab sa gihatagan og insentibo ang tanang atleta nga mirepresentar sa Loreto, bisan kadtong wala nakadaog og medalya, isip pag-ila sa ilang dedikasyon ug sakripisyo.
Alang sa lokal nga kagamhanan, ang matag-atleta makonsidera nang mananaog tungod sa ilang paghatag sa labing maayong performance alang sa ilang lungsod.
Gihatagan usab og cash incentives ang mga coaches ug trainers isip pagpasalamat sa ilang paggiya ug pag-amuma sa talento sa mga atleta tungodkay ang ilang kalampusan bunga sa hiniusang paningkamot sa mga atleta, pamilya, magtutudlo, coaches, ug eskwelahan.
