BUTUAN CITY – Pakyas ang Philippine Men’s National Football Team sa pagsulod sa 2027 AFC Asian Cup human matapos sa 1-1 draw ang ilang duwa batok sa Tajikistan national football team sa katapusang bahin sa qualifiers.
Kinahanglan unta sa Pilipinas nga makakuha og tulo ka puntos aron makasulod sa torneo, apan wala nila kini makab-ot.
Una nga nakaiskor ang Pilipinas pinaagi kang Raphael Obermair sa ika-19 minuto sa duwa.
Apan sa ika-40 minuto, natabla ang duwa pinaagi kang Sheriddin Boboev sa Tajikistan national football team.
Hangtod sa katapusan, naningkamot ang Pilipinas nga makadaog, apan lig-on kaayo ang depensa nga gipakita sa Tajikistan national football team.
Hinungdan usab nga usa ra ka top team sa matag grupo ang makasulod sa AFC Asian Cup.
Hinumduman nga mihimo og lima ka adlaw nga pagbansay ang Philippine Men’s National Football Team sa Turkey sa wala pa ang maong duwa.
