BUTUAN CITY- Patay ang usa ka 46-anyos nga mag-uuma human kini gipaulanan og bala sa wala pa mailhing suspetsado sa Purok 6, Sta. Cruz, Barangay Sta. Irene, Bayugan City, kagahapon sa gabie Sabado, Mayo 2, 2026.
Giila sa kapulisan ang biktima nga si Reynaldo Pulgo Guleman, minyo ug residente ra usab sa maong lugar.
Base sa inisyal nga imbestigasyon, nahitabo ang krimen pasado alas 10:30 sa gabie samtang ang biktima anaa sa maong dapit. Kalit lang matod pa kining giduol ug gipusil sa makadhang higayon nga miresulta sa iyang hinanaling kamatayon.
Sa pagkakaron, blangko pa ang Bayugan City Police Station sa motibo sa krimen ug kon kinsa ang responsable sa maong pagpamusil. Padayon pa ang gihimong “follow-up investigation” sa mga otoridad aron mailhan ug madakpan ang mga suspetsado.
Samtang gihulat pa usab ang dugang detalye gikan sa Scene of the Crime Operatives (SOCO) kalabot sa gidaghanon sa samad nga naangkon sa biktima ug ang klase sa armas nga gigamit sa insidente.
