BUTUAN CITY – Nagka-areglo na ang pamilya sa mag-inahan nga napatay ug ang drayber sa sakyanang nidaru sa ilang panimalay kagahapon sa alas 6:27 sa buntag sa may Purok-4, Barangay Sanghan, siyudad sa Cabadbaran, Agusan Del Norte.
Sigon ni PO2 Jucem Dela Victoria sa Cabadbaran City Police Station, nagkasinabot nga bayaran sa suspetsadong si Louie Fernandez Fuentes-30-anyos nga taga Barangay San Vicente ning dakbayan sa Butuan, ang tanang damyos human nadaru ang panimalay sa pamilyang Moleon.
Nasayrang nag-gikan sa Butuan City ug padulong unta sa siyudad sa Surigao ang suspek sakay sa usa ka Izusu D-Max Pick-up type nga nagtangag sa plaka numero XPY 254, apan sa pag-abot sa nahitaboan, ni-slide matud pa ang ligid sa sakyanan tungod sa kadanlog sa dalan hinungdang wala na niini nakontrola pa ug midaru sa panimalay sa biktima.
Niadtong higayun, na-atol nga nag-abli sa tindahan ang asawa ni Joel nga si Maricel ug anak niini nga si Justine,9-anyos nga maoy nadaru sa sakyanan hinungdan sa dili ti-aw nga damyos nga ilang nahi-aguman nga nisampot gayud sa kamatayon sa mag-inahan.
Sa karun, gipahiluna na ang patay’ng lawas sa mga biktima samtang ang sakyanan nga nalambigit sa disgrasya, gikustudiya na sa Cabadbaran City Police Station alang sa tukmang disposasyon.
