BUTUAN CITY – Nagdeklara na og state of emergency ang gobernador sa Belgorod region karong anaa na sa ikaduhang semana ang pagsulod sa pwersa sa Ukraine sa mga teritoryo sa Russia.
Sigon ni Governor Vyacheslav Gladkov, ang kada-adlaw nga pagpamomba sa Ukrainian forces, miguba sa kabalayan sa katawhan ug mikalas na sa kinabuhi sa mga sibilyan.
Kini human nga ang pagsulod sa Ukrainian forces sa Kursk region, anaa na sa ikaduhang semana.
Sigon sa Ukraine, mi-abot na sa 74 ka mga lungsod ug villages ang ilang nakontrol sukad nila gisugdan ang surprisang pag-atake ngadto sa Russian territory niadtong Agusto 6 kansa mao ang pinakalawom ug pinaka-importanteng incursion ngadto sa maong nasud sukad gilusad sa Moscow ang ilang full-scale invasion.
Gi-akusahan karon ni Russian President Vladimir Putin ang Ukraine nga nakakomitar og mga krimen batuk sa katawhan sa Russia dayong butyag nga madawat sa Kyiv ang ilang balos.
Samtang sa entiro gabii, gipadayag sa Russia nga naguba sa ilang air defences ang upat ka mga missiles ug 117 ka mga drones nga gilusad sa Ukraine. Samtang gipadayag usab sa Russia’s defence ministry nga pipila na ka mga rehiyon apil na ang Kursk, Voronezh, Belgorod ug Nizhny Novgorod, maoy gi-target.
