BUTUAN CITY – Giklaro ni Atty. Moshi Ariel Cahoy, ang hepe sa Business Permits and Licenses Division kon BPLD ning siyudad sa Butuan nga unang batch pa lang ang tulo ka FM radio stations nga temporaryo nilang gisuspende ang operasyon samtang gitrabaho pa ang ilang congressional franchise.
Sa eksklusibong pakighinabi sa Bombo Radyo Butuan, gibutyag sa opisyal nga ang Radyo Trumpeta ug ang Bai FM wala nila isyuhi og permit to operate tungod sa kawala niini prangkisa nga maoy usa’y basehan aron ma-isyuhan sila og license to operate sa National Telecommunications Commission kon NTC.
Gihimo nila ang istriktong pagpatuman sa Republic Act 3846 human ang duha ka hugnang panagtagbo nila sa mga opisyal sa NTC tungod sa paspas nga pagpangsulpot sa mga local radio stations ning siyudad hangtud nga nasuta nga wala kini mga prangkisa ug business permits.
Dugang sa opisyal, musunod pa sa maong mga FM stations ang lain pang mga sibyahan nga gitawag nilang ‘fly by night’ human naglumba pagpanglugwa atol sa eleksyon.
Naglisod matud pa sila pag-trace sa uban tungod kay gipangpawong man ang ilang transmitter hangtud nga nasapon ra sa subsob nilang monitoring ning nakalabay’ng duha ka semana.
