BUTUAN CITY- Nagpahimangno si Senator Panfilo “Ping” Lacson nga mahimong mosangpot sa usa ka constitutional crisis ang impeachment trial ni Vice President Sara Duterte kon adunay mga senador nga ma-preventive suspension o madetine tungod sa imbestigasyon sa giingong mga iregularidad sa mga proyekto sa flood control.
Sumala ni Lacson, kinahanglan tun-an ang posibilidad nga tugotan gihapon ang mga apektadong senador nga motuman sa ilang papel isip senator-judges sa impeachment court bisan pa man kon dili sila makatrabaho isip mga magbabalaod. Gipasabot usab niini, nga kung mokunhod ngadto sa 15 ang mga miyembro sa impeachment court tungod sa suspensyon o detensyon, mahimong lisod makab-ot ang gikinahanglang 16 ka boto o 2/3 nga boto sa tanang senador aron makahatag og desisyon sa impeachment case. Gisugyot usab ni Lacson, nga mahimong i-postpone sa makadiyot ang hearing sa kaso hangtod mahuman ang posibleng 90 ka adlaw nga preventive suspension sa mga senador.
Samtang, mingsupak si Lacson sa sugyot ni Senator Alan Peter Cayetano nga mahimong ipaubos ngadto sa 12 ang gikinahanglang boto alang sa conviction o acquittal, ug iyang gipasiugda nga klaro sa Konstitusyon nga kinahanglan ang boto nga 2/3 sa tanang miyembro sa Senado aron mahukman ang usa ka opisyal sa impeachment proceedings.
