BUTUAN CITY – Tungod sa isyu sa seguridad, duha ka mga tunghaan sa duha ka mga barangay ning siyudad sa Butuan ang nagsuspende sa ilang klase karong adlawa human ang pagpang-harass sa mga rebeldeng New People’s Army kaganinang buntag sa Butuan City Police Station 5 nga nakabase sa Brgy, San Mateo.
Unang nagsuspende sa ilang tibuok adlaw nga klase ang San Mateo Elementary School tungod sa kahadlok sa faculty and staff sa mga posible pang mahitabo human ang harassment nga miresulta sa pagka-angol ni PO1 Ritchel Golandrina.
Sigon ni Rex Magdamit, ilang gilantaw ang seguridad sa 290 nila ka mga magtutungha ilabina nga pista sa maong barangay karong adlawa rason nga mas maayong ma-atiman sila sa ilang mga ginikanan.
Samtang gibutyag usab sa magtutudlong si Roque Celestial nga gisuspende sa ilang principal sa Tungao National High School sa kasikbit lang nga Brgy. Tungao ang ilang klase karong hapon alang na usab sa seguridad sa tanan ilabina nga na-igo sa bala ang ilang dress-making and tailoring room.
Nagpadayon pa ang pursuit operations sa kapulisan aron magukod ang misibat nga mga rebelde. (Beth Ruiz)
