BUTUAN CITY – Magpabiling normal ang klase sa tanang ang-ang ning siyudad sa Butuan karong adlawa taliwa sa pagsalmot sa Butuan Transport Federation Inc. sa nationwide transport strike.
Nasayrang nag-unang gibabagan sa transport group nga maphase-out ang mga karaang Public Utility Vehicles kon PUVs.
Sa eksklusibong interview sa Bombo Radyo Butuan, gipadayag ni Department of Transportation and Railways kon DOTr-Caraga Regional Director Ma. Christina Cassion, nga duna’y 23 ka mga transport cooperatives ug corporations ning rehiyon ang mikumpirmang dili musalmot sa hunong-pasada.
Dugang pa sa opisyal, wala’y angayang ikabalaka ang mga commuters nga ma-apektuhan sa transport strike tungod kay duna’y libreng pasakay ang Diamond Transport Cooperative.
Kini gawas pa sa paghatag usab og libreng sakay sa pipila ka mga police patrol cars aron wala’y commuters nga ma-stranded sa mga kalsada ilabina kadtong musulod sa ilang klase ug trabaho.
Subling giklaro ni Cassion nga daan na silang nagpasidaan ning nakalabay’ng semana nga tantangan ug prangkisa ang musalmot sa transport strike karong adlawa busa kaganinang alas-kwatro pa lang sa kaadlawon, naka deploy na ang ilang mga enforcers aron nga mag-monitor ug mag-inspect sa ilusad nga strike.
Malaumon usab ang DOTr official nga gamay lang ang musalmot sa maong kalihukan karong adlawa dungan sa panawagan nga ipabiling hapsay ang ilang hunong pasada, ingon man dili mamugos sa ubang mga driver nga muapil sa ilang protesta.
