BUTUAN CITY – Gi-andam na sa Criminal Investigation and Detection Group kon CIDG-Caraga ang mga kasong ipasaka batuk sa besi-mayor sa lungsod sa Kitcharao, Agusan del Norte og sa iyang body guard human nakuhaan og mga armas atol sa gilusad nga raid ning mi-aging gabii.
Giklaro ni CIDG-Caraga Regional Chief Choli Caduyac, dugay nang duna’y intelligence report ang ilang ahensya kalabot sa gilambigitang gun-running activity sa body guard ni Vice Mayor Jenrey Montante nga si Sergio Rafal.
Sulod sa upat ka buwan nila kining gipanid-an kondiin ilang nasayran nga duna kini’y kutay sa mga arms suppliers. Dinhi nila gipalawman pa ang imbestigasyon hangtud nga nasutang nagtrabaho kini ubos sa maong besi-mayor.
Dugang pa ni Caduyac, ang panimalay gyod sa subject person nga si Rafal maoy ilang gi-raid human nga pila ka semana na nilang nasayrang wala na matud pa mag-ulian sa iyang panimalay ang besi-mayor tungod kay didto na kini sa iyang pamilya sa Surigao.
Nakuha gikan sa posisyon ni Rafal ang tulo ka mga pistola nga gilangkuban sa usa ka Ingram og duha ka kalibre 45 nga pistola apil na ang tag-duha ka rifle og augmentation grenades og mga bala.
Dihang ila na untang dalhon sa ilang buhatan si Rafal, nakadawat kini og tawag nga paadtuon sa panimalay sa besi-mayor rason nga ila kining gi-ubanan og gisuhid ang kinatibuk-ang panimalay sa opisyal diin ilang nakuha ang tag-usa ka baby armalite og M16 armalite rifles ingon man usa ka kalibre 5.56 rifle kondiin wala’y gipakitang pertinenteng papeles ang opisyal.
Nasayrang ang masapong naghupot og eksplosibo sama sa granada, wala’y pyansang irekomenda ang korte. (Beth Ruiz)
