BUTUAN CITY – Gi-andam na ang mga kasong ipasaka batuk sa kapitan sa Brgy. Lipata, Surigao City human ang malampusong pagpatuman sa search warrant nga gipagawas ni Judge Dante Corminal, presiding judge sa 5th MCTC nga nakabase sa Tubod-Alegria, Surigao del Norte.
Pasado alas-5:30 kagahapon sa hapon dihang gi-search sa mga sakop sa Philippine Drug Enforcement Agency kon PDEA-Caraga, ingon man sa Drug Enforcement Units sa Surigao City Police Station, Agusan del Norte Police Provincial Unit ug sa 1st Provincial Mobile Force Company ang pinuy-anan ni Kapitan Loel Joy Mesias, 49-anyos, residente sa Purok 1 sa maong barangay.
Nakuha sa maong operasyon ang napulo ka sachets sa 6-gramos nga gidudang shabu nga gibutang sa usa ka sling bag ug gibana-banang nagkantidad og 70-mil, 800-pesos, usa ka kalibre .38 nga revolver nga duna’y unom ka mga bala apil na ang iyang cellphone og DILG ID.
Gikatakdang pasakaan siya og mga kasong paglapas sa RA 9165 kon Dangerous Drugs Act of 2002 ingon man RA 10591 kon illegal possession of firearms.
Gipadayag sa kapitan nga na-shock siya sa maong panghitabo dungan sa pagbutyag nga sa korte na niya panalipdan ang iyang kaugalingon.
