BUTUAN CITY– Nakumpiska sa operatiba gikan sa Department of Environment and Natural Resources kon DENR-Caraga ang kapin sa usa ka milyon ka pesos nga kantidad sa ilegal nga kahoy sa gihimong operasyon sa may Sitio Marang Barangay Kasapa 1 in Loreto, Agusan del Sur sa nakalabay nga adlaw.
Usa ka Elf boom truck og laing 60 ka piraso o muabot sa 48.37 kubiko sa kahoy nga gubas og sagol nga dipterocarp species nga nagkantidad sa 1-milyones 363-mil 586 pesos og 40 sentabos. Gawas pa sa 16 ka piraso o 2,557.30 board feet sa ginabasa nga kahoy.
Sa taho ngadto kang Secretary Roy A. Cimatu ni OIC,Regional Executive Director sa DENR 13 Hadja Didaw D. Piang-Brahim dunay nadakpan usab ang kapulisan nga 2 ka indibidwal sa maong lugar nga gikustudiya na sa Loreto Municipal Police Station alang sa pagpasaka og kaso sa paglapas sa PD 705 og qualified theft.
Sigon sa OIC, CENRO sa Loreto nga si Racelyn A. Argocino nga makonsiderang hilit og criticial ang lugar diin gihimo ang pagpamutol sa kahoy.
Sa eksklusibong pakighinabi ning sibyahan sa team leader nga si Modesto Lagumbay, nakadawat sila og impormasyon sa gihimong ilegal nga pagpamutol sa kahoy sa maong dapit rason sa gihimong anti-illegal logging operation. Ang drayber sa boom truck nakahimo sa pagsibat pinaagi sa pag-ambak sa pangpang.
Apan seguradong mailhan ra ang mga indibidwal nga kinahanglang kasuhan pinaagi sa himoong imbestigasyon. Sigon ni Lagumbay nga ning kasamtangang tuig kini ang pinakadako nilang operasyon. Sa kasamtangan gibutang na sa depository area sa maong lungsod ang nakuhang mga kahoy samtang ang sakyanan gikustudiya sa Police Station alang sa tukmang disposasyon.
