(photo credit: Annirose Mansaginda)
BUTUAN CITY – Nabalaka na ang mga residente og mga opisyal sa lungsod sa Nasipit, Agusan del Norte tungod sa sunod-sunod nga pagkasakit og pagpa-admit sa gibana-banang 60 ka mga residente sa Sitio Mimbajande sakop sa Brgy. Camagong kinsa na-igo sa ubo, hilanat mga msangpot sa pagtakig, pagsuka-suka nga musangpot usab sa dehydration ingon man pagkasunggo sa pipila sa mga niini.
Kini ang hinungdan nga nagdasok sila Nasipit District Hospital kondiin ang uban, diha na lang sa lobby sa ospital nanghigda samtang ang uban gidala sa Agusan del Norte Provincial Hospital aron mas ma-atiman og maayo.
Sigon sa usa sa mga watchers nga si Marissa Mandahinog, nagsugod matud pa ang pag-igo sa maong sakit sa ilang lugar niadtong unang semana ning buwan sa Nobyembre kondiin halos ang kada-balay, magdungan og kasakit ang mga membro sa pamilya.
Gani sa ilang pamilya, una matud pang nasakit og na-ospital ang iyang ugangan nga gisundan sa 17-anyos nga bayong-bayong og 8-anyos nga batang ilang kabanay.
Duna’y mupa-uli apan balikan sa hilanat rason nga mabalik pagka-admit sam tang ang ilang watchers matadan na usab rason nga apil na sa napa-admit.
Ang gipadayag sa doktor nga findings sa ilang sakit nagsumikad matud pa sa urinary tract infection kon UTI og ubo kondiin nagtakod-takod na.
Ang gikabalaka karon sa mga hingtungdang pamilya mao ang ilang bayrunon og maintenance sa ilang tambal ilabina nga duna’y pipila ka pamilyang mangasakit ang ilang mga membro sa pamilya rason nga magbahin-bahin sila sa gamay nilang kinitaan alang sa ilang maintenance sa tambal ingon man ilang bayrunon gamit ang PhilHealth. (Beth Ruiz)
