BUTUAN CITY – Pabalik na sa Iran ang kapin sa 200 ka mga Iranian sailors nga na-stranded sa Sri Lanka human natanggong sa maong nasud og kapin sa usa ka buwan.
Kaganina gikumpirma ni Sri Lanka’s Deputy Defence Minister Aruna Jayasekara, nga mi-abot sa 32 ka mga sailors ang na-rescue gikan sa Iris Dena samtang laing 206 usab ang gikan sa Irins Bushehr, ang mibiya na sa Sri Lanka.
Madumdumang ang Iranian warship nga Iris Dena, na-unlod niadtong Marso 4 human kini na-igo sa usa ka torpedo nga gikan sa US submarine hinungdan sa pagkamatay sa 104 ka mga sailors.
Pagka-Marso 5, nakontrola sa Sri Lanka ang Iranian naval vessel nga Irins Bushehr, human kini mihangyo nga mudunggo sa mga pantalan sa maong nasud dihang nag-malfunction ang ilang mga makina.
Ang na-stranded nga mga sailors gihatagan og 30-day entry visas sa Sri Lankan government ug gipapuyo sa mga navy ug air force camps. Nasayrang pabalik na unta ang Iris Dena gikan sa usa ka military exercise nga gi-host sa India dihang kini gi-atake.
