BUTUAN CITY – Subsob ang pagpagandam karon sa gobyerno sa Japan subay na sa gilaumang pagkuso-kuso sa super typhoon Haishen sa maong nasud.
Sa pakighinabi sa Bombo Radyo Butuan, gipadayag ni Reuben Cabaluna Jr., Butuanon Overseas Filipino Worker sa Japan nga adto pa lang adlaw nga Biernes, subsob na ang pag-abiso sa gobyerno sa katawhan niini ilabina sa mga lugar nga agi-an sa gikonsiderang super typhoon nga matandi matod pa ang kakusgon niini sa Bagyong Yolanda nga mikuso-kuso sa dakong parte sa Leyte ug Samar niadtong 2013.
Sumala ni Cabaluna gihimo na sa gobyerno sa Japan ang tanang klase sa pagpangandam gani adto palang Biernes aduna nay mga residente nga gihikling labi na sa Kyushu Island kondiin as of alas-siete kagabii, mukabat na sa 1.8 million ka mga tawo ang nahikling ug sa pagsulat niining balita nabati na sa isla sa Kyushu ang pagkuso-kuso sa maong bagyo.
Gipabuhagay na usab ang tubig sa Miyasaki dam aron mas mapugngan pa ang pagsaka sa level sa tubig ug makalikay sa posibeng dakong damyos nga mahatud sa pag-igo sa bagyo nga gilaumang maghatod og kusog nga hangin ug ulan.
Subayon matod pa sa bagyong Haishen ang isla sa Okinawa, Kyushu Island ug ang dakong parte sa Japan dungan sa pagpadayag nga gilauman na usab sa kagamhanan ang storm surge nga dili mo ubos sa 10-metro ang giladmon.
