BUTUAN CITY – I-atubang karong adlawa sa himuong press conference sa Police Regional Office kon PRO 13 sila Kabus Padatuon kon KAPA Community Ministry International Incorporated founder Joel Apolinario ug laing 23 human na-aresto kagahapong adlawa.
Sa eksklusibong pakighinabi sa Bombo Radyo Butuan, gibutyag ni Police Major Armando Martisano, Chief of Police sa Lingig Municipal Police Station,nga sa himuong press conference, ibulgar ang kinatibuk-ang dagan sa panghitabo sa nasangpit nga operasyon.
Lakip sa hatagan og katin-awan ang ihap sa casualty sa maong operasyon ug uban pang impormasyon nga angay masayran sa publiko.
Nasayran kagahapong sa alas 7:30 sa buntag dihang gi-serve ang 2 ka warrants batok kang Apolinario nga miresulta sa binakbakay human nagpabuto ang iyang mga ginsakpan.
Human ang engkwentro, napatay ang usa ka lalaking na-igo sa tuong tiil ug gidala na sa Bislig City Hospital nga na-ilang si Melecio Siano.
Na-aresto usab sa operasyon si Apolinario ug ang 23 niini ka mga kaubanan samtang nakumpiska ang 30 ka units sa sa M16 rifle, 2 units ka sa M4, 1 garand rifle, 3 nga 60 caliber machinegun, 1 Cal 50 sniper rifle, 3 Cal 22 rifle, 1 carbine, 1 shotgun, 2 RPG rifle, 5 cal 45 pistol, 2 rocket propelled grenade ug daghang mga bala sa managlahing klase sa armas.
Gihimo ang operasyon sa mga sakop sa RSOG, Surigao del Sur Police Provincial Office, pecial Action Force kon SAF, RPSB, 1st PMFC, R2-Division, Lingig Municipal Police Station ug Philippine Coast Guard dala ang warrant of arrest nga gi-isyu ni Judge Gil Bollzos, presiding judge sa RTC Branch 21 sa Cagayan de Oro City tungod sa kasong sydicated estafa nga wala’y pyansang girekomenda ug ang search warrant nga gi-isyu ni Judge Catalina Shineta Tare-Palacio tungod sa paglapas usab sa RA 9516 ug sa RA 10591.
Gikonsiderang isolated resort ang gitaguan ni Apolinario sa may Brgy Handayaman, Lingig, Surigao del Sur diin gipadayag ni Surigao Del Sur Governor Alexander “Ayec” Pimentel nga wala kini kabalo nga anaa sa lugar nagtago si Joel Apolinario.
