BUTUAN CITY – Giklaro ni Atty. Jelbert Galicto nga nasuko sa mga regional vice presidents sa PhilHealth-Mindanao si PhilHealth interim President Celestina de la Serna human nila gikwestyon ang paghupot niini sa maong posisyon human gitudlo sa Board of Directors sa ahensya inay nga sa presidente sa Pilipinas.
Sa eksklusibong pakighinabi sa Bombo Radyo Butuan, gipadayag ni Atty. Galicto nga tungod sa kanunay nilang pagkwestyon, gi-reassign sila ni dela Serna kansa na-andan na matud pang silot niadtong mga mukwestyon sa gipatumang palisiya sa ilang mga kadagkuan.
Dinhi na sila mipasaka og kaso ngadto sa Ombudsman nga gikasuko usab sa board rason nga nadugangan ang mi-init kanila.
Gipasabot pa niini nga kinahanglan nilang i-impede ang board tungod kay sila man ang mi-instalar kang de la Serna sa maong posisyon imbes nga ang presidente sa Pilipinas kansa maoy rason sa pagpasaka nila og kaso sa Ombudsman.
Giklaro pa niini nga wala’y problema alang kanila kung kinsa ang itudlo basta nagsunod lang sa legal nga proseso tungod kay kung ilegal ang pagkatudlo niini, samot nga ilegal usab ang sudlan niining mga transaksyon.
