BUTUAN CITY – Gipadayag ni Department of Justice kon DOJ Undersecretary Raul Vasquez nga gibutang sa house arrest sa korte sa Dili, Timor Leste si kanhi Negros Oriental Rep. Arnolfo “Arnie” Teves Jr. tungod kay gikonsidera kining flight risk samtang gidungog ang iyang extradition case.
Apan bisan og naka-house arrest, gikuhaan pa gihapon sa korte og kagawasan si Teves ug hugot nga gibantayan sa mga pulis.
Gikumpirma usab ni Atty. Ferdinand Topacio, abogado ni Teves ang house arrest sa iyang kliyente apan gilimod nga tungod kini sa pagka- flight risk sa kanhi kongresista.
Base sa mga impormasyon nga gipagawas sa Timor-Leste media agency, gipadayag sa Court of Appeals (CA) nga mi-abot sa ilang nasud si Teves sakay sa private plane niadtong Abril 2023.
Nagpuyo kini sa usa ka balay nga dunay binulan nga renta nga 10-mil dolyares o bugti sa tunga sa milyon ka pesos kauban ang iyang asawa ug mga anak.
Duna usab kini 20 ka ginsakpan nga gilangkuban sa 10 ka Pinoy ug 10 ka Timorese.
Nagpadayon ang pagdungog alang sa extradition ni Teves aron hingpit na siyang makauli sa nasud ug mapatubag ang mga giatubang nga kaso.
