BUTUAN CITY – Na-turned-over na ngadto sa Tagum City Police Station ang kanhe pulis nga pinangeta sa balaod human kini nasikop kagahapon sa alas 11:00 sa buntag sa may Brgy. Manawe, Loreto, Agusan del Sur.
Giila ni Police Regional Office kon PRO-13 director Chief Supt Gilberto DC Cruz ang suspek na si Miguel Esteban Driz, kanhe Senior Police Officer 1 ug residente sa Brgy. Sta. Teresa sa susamang lungsod.
Gisikop ang suspek base na usab sa warrant of arrest nga gi-isyu ni Hon. Arlene Lirag-Palabrica, Presiding judge sa Regional Trial Court Branch 31 sa Tagum city sa kasong paglapas sa COMELEC gun ban ilalom sa criminal case number 18685 diin walay gitakdang piyansa.
Si Driz, 43-anyos, misulod sa Philippine National Police niadtong 2000 apan napapahaw niadtong Nobyembre 4, 2013 tungod sa iyang absence without official leave kon AWOL.
Niadtong 2012, nasikop ang suspek sa Tagum City tungod sa pagdala ug armas bisan paman sa implementasyon sa election gun ban.
