BUTUAN CITY – Gipadayag ni kanhing U.S. Vice President Kamala Harris nga posible siyang modagan pag-usab sa pagka-presidente sa 2028, bisan wala pa siya’y pinal nga desisyon.
Sa usa ka pulong sa National Action Network sa New York City, direktang gipangutana si Harris kung plano ba niya nga mosalmot pag-usab sa presidential race diin mitubag siya nga naghuna-huna na siya niini nga gisugat sa kusog nga pagpakpak sa mga nanambong.
Dugang pa niini nga iyang susihon ang desisyon base sa kung kinsa ang labing angay nga mangulo alang sa katawhang Amerikano sa 2028.
Mahinumdumang si Harris, nga nagsilbing bise presidente ilawom ni kanhing U.S. President Joe Biden, napildi sa 2024 presidential election kang Donald J. Trump, nga midaog sa popular vote ug Electoral College.
Sa wala pa mahimong bise presidente, nagsilbi usab si Harris isip U.S. senator ug attorney general sa California, ug kaniadto usab nga midagan sa Democratic presidential nomination niadtong 2020.
Sumala sa mga political observers, mahimong hagit kaniya ang pagdagan pag-usab tungod sa mga panawagan sa pipila ka botante nga kinahanglan na og mas bag-ong liderato sa Democratic Party human sa iyang kapildihan sa 2024.
Mitambong usab sa maong tigom ang pipila ka posibleng kandidato sa 2028 sama nila Josh Shapiro, kanhing Transportation Secretary Pete Buttigieg, ug Illinois Governor JB Pritzker.
