BUTUAN CITY – Nanumpa na kaganinang buntag sa Sangguniang Panlunod kon SP session hall isip bag-ong kapitan sa Brgy. Aupagan ning siyudad sa Butuan, si first Kagawad Melanio Laag human boluntaryong mikanaog sa pwesto si Kapitan Noel del Mundo tungod sa iyang kondisyon sa panglawas.
Gihimo ang dinali-ang pagpanumpa sa katungdanan aron dili malangay ang serbisyong gihatag ngadto sa katawhan sa maong barangay.
Sa eksklusibong pakighinabi sa Bombo Radyo Butuan, gipadayag ni Kapitan Laag nga apil sa iyang lihukon ang pagdugang og usa ka kagawad aron makompleto ang ilang barangay council ug pagplastar na sa ilang infrastructure project.
Nanawagan siya sa tanan niyang mga tagi-barangay nga maghi-usa alang sa ilang kalambuan ug dili magpanuko pagduol kanilang mga opisyal aron malikayan ang panagbahin-bahin.
