BUTUAN CITY- Masaligon si Music creatives, content, and operations head Jonathan Manalo nga adunay dakong potensyal ang Pilipinas nga mopakita sa internasyonal nga entablado pinaagi sa Eurovision Song Contest Asia 2026, diin pilion ang nasudnong representante gikan sa 10 ka entries sa Pili, Pinas! Philippine Selection Night.
Sumala ni Manalo, usa sa pinakadakong bentaha sa mga Filipino mao ang natural nga talento sa musika ug kusog nga live performance, nga iyang gilaumang mapakita sa tibuok kalibotan sa kompetisyon nga himuon sa Nobyembre 14 sa Bangkok, Thailand.
Ang 10 ka partisipante naglakip sa nagkalain-laing klase sa mga musikero ug performers, nga nagpakita sa kalapad ug nagkanda-iyang talento sa mga Filipino.
Bisan pa man nga gitun-an sa team ang mga nakadaog ug nakigkompetensya sa miaging Eurovision, gipasiugda ni Manalo nga dili nila kopyahon ang estilo sa ubang nasud, kondili ilang butangan og kaugalingong Filipino flavor ug interpretasyon ang ilang performance.
