BUTUAN CITY- Gipasalig sa Iran sa Pilipinas nga luwas ang pag-agi sa mga barko nga nagdala sa bandila sa Pilipinas ug ang tanang Filipino seafarers sa Strait of Hormuz, sumala sa Department of Foreign Affairs (DFA) niadtong Huwebes, Abril 2, 2026.
Apektado ang maong pantalan tungod sa nagpadayon nga giyera sa Middle Easr kansa nakaapekto sa suplay sa lana sa tibuok kalibutan.
Sumala sa DFA, nahimo ang kasabutan human sa phone conversation tali ni Foreign Affairs Secretary Ma. Theresa P. Lazaro ug Iranian Foreign Minister Seyed Abbas Aragchi.
Gisiguro sa Iran nga tugotan ang luwas, walay babag ug paspas nga pag-agi sa mga barko sa Pilipinas sa maong daungan.
Kini subay sa hangyo sa Pilipinas nga itratong “non-hostile country” aron masiguro ang kaluwasan sa Strait of Hormuz nga nagdala og hapit 20% nga suplay sa lana ug liquefied natural gas sa kalibutan.
Sigon pa sa DFA nga importante kini nga lakang aron maprotektahan ang mga seafarers ug masiguro ang seguridad sa enerhiya sa nasud, ilabi na nga misaka ang presyo sa lana nga nakaphimo sa Pilipinas sa pagdeklarar og state of national energy emergency.
Sumala ni Palace Press Officer Claire Castro, mainit ug bukas ang panag-istorya sa duha ka panig.
Lakip usab sa miting si Energy Secretary Sharon Garin ug Iranian Ambassador Yousef Esmaeilzadeh.
Nagkasabot ang duha ka nasud nga iproseso ang tanang hangyo sa gobyerno pinaagi sa opisyal nga diplomatic channels aron mapaspasan ang pagtubag niini.
