BUTUAN CITY – Ipatuman sa Libertad, Butuan City barangay council ang hard barricade sa pipila ka dapit sa ilang barangay nga duna’y kumpirmadong kaso sa COVID-19. Kini human nadugangan og upat ka mga bag-ong kaso ang una nilang usa ka kaso kagabii base na sa datus nga gipagawas sa Department of Health kon DOH-Caraga nga duna’y 12 ka mga bag-ong kaso sa rehiyon nga pulos taga-Butuan.
Sa eksklusibong pakighinabi sa Bombo Radyo Butuan, gipadayag ni Kapitan Menchie Rosario nga alarming na ang pagtaas sa local transmission sa maong kaso sa ilang barangay rason nga kinahangan na og hugot nga aksyon pinaagi sa pagmontar og barikada aron malimitahan nila ang pagsulod-gawas sa mga tawo samtang wala pa matapos ang contact-tracing.
Ang iya lang gihangyo mao ang kooperasyon sa tanan kondiin sundon gyod ang mga gipatumang health protocols kung gusto sa tanan nga dili na dili ma-igo sa makamatay nga coronavirus.
Kini ilabina nga hangtud karon, daghan gihapon ang nagsupak niini sama sa dili pagsuot og face mask higayong mugawas sa balay. Hangyo niini sa tanan nilang mga residente nga dili na mukwestyon sa mga ipatumang guidelines kay alang man kini sa kaluwasan sa tanan ilabina nga lima ka buwan na silang apektado sa pandemya.
