BUTUAN CITY – Hilabihan ang pasalamat sa usa ka habal-habal drayber nga taga Barangay Sumili ning siyudad sa Butuan human nakadawat sa libreng aluminum crutches nga gisalig sa Bombo Radyo ni Pastor Vicente Serrano.
Nasayran nga naghakot og falcatta si Anjele Motita gamit ang habal-habal apan way swerteng natumba kini og midat-og sa iyang tuong paa rason sa pagkabali.
Nahitabo kini bandang alas 12:00 sa udtu niadtong Setyembre 26. Kagahapong adlawa, hingpit na silang kagawas sa Butuan Medical Center diin gihatagan og refferal ni Dr. Bartolome Caparal nga modalikyat sa Bombo Radyo aron mahimong benipisiyaryo sa libreng crutches.
Sa eksklusibong pakighinabi ning sibyahan kang Motita, walay laing nabungat niini kundi ang pagpasalamat ning sibyahan lakip sa sponsor nga si Pastor Serrano. Samtang gisaysay usab sa iyang asawa nga si Marites Diego ang nadangatan sa pasyente.
Nasayran nga mismong si Barangau Sumili, Butuan City Kapitan Dominador Paglinawan pa ang nagmaneho sa service sa barangay aron maoy mukuha sa pasyente. Dako ang pasalamat usab sa kapitan tungod kay nahatagan og crutches ang iyang residenteng nanginahanglan.
