BUTUAN CITY – Lisod nga makalusot sa US Congress ang proposal nga gun control bisan pa man sa matag-karon ug unya nga mass shootings nga natigayon sa bisan asang estado.
Kini ang pamahayag ni Bombo international correspondent Zairie Moraga direkta gikan sa San Francisco, California, sa eksklusibong pakighinabi sa Bombo Radyo Butuan.
Gipadayag niining daghang mga factors ang angayang ikonsidera sama sa kitaon sa mga namaligya ug armas, personal nga proteksyon sa mga sibilyan nga angayang armasan tungod sa delikadong nature sa ilang trabaho o kaha lugar nga gipuy-an ug daghan pang uban.
Dugang pa ni Moraga, ang angayan matud pang tutukan sa kagamhanan aron masulbad na ang sunod-sunod nga mga mass shootings mao ang nag-unang rason sa paghimo niini sama sa depresyon.
Gipadayag pa niini nga sa ilang estado lang sa California, daw ordinaryong butang lang kung paliton ang mga pistola tungod kay wala nay daghang dokumentong pangitaon pa gawas lang sa identification card kon ID.
Regulated matud pa ang pagbaligya og armas sa ilang lugar ilabina ang mga tag-as nga klase kondiin makapalit lang niini ang nag-edad og 21-anyos pataas sukwahi sa ubang estado sama sa Texas nga mahimong makapalit niini ang mas ubos nga edad.
Sa ilang estado usab, bawal ang pagbaligya og long firearms kansa sukwahi usab sa ubang mga estado diin mas lu-ag ang ilang patakaran sa pagpamaligya og mga high-powered firearms.
